مديت لك يمناي يوم انـت محتـاج ----------وثنّيتها يوم انت في غاية الضيـق
ومشيت لك بإخلاص مع كل منهـاج --------وسعيت لك في كل مافيـه توفيـق
مااغضيت عنك وفيك ماكنت هـراج --------طبعي ومن طبع الرجـال المطاليـق
ويوم انها صارت سهالات وافـراج ---------وتفتحـت قدمـك دروبٍ مغالـيـق
مريتني كنه علـى راسـك التـاج ----------مـن الكبـر ماتلتفـت فالمخاليـق
لو ان في وجهك حيا جابك احـراج ----------ولو فيك شيمه مانسيـت المواثيـق
والا فأنا مااندم علـى فلـة حجـاج ----------عاداتنا نفزع اليا انلاثـت الريـق
لو دم جوفي للخوي طـب وعـلاج ----------غدا لدمي مـن عروقـي تدافيـق
رداك هـذا مايسبـب لـي ازعـاج ----------مادامني مااخطيت لاازعل ولااضيق
دنياك غرت مثلك افـواج وافـواج ---------تهافتـوا ورى المصالـح مشافيـق
ياما بنوا فيهـا عمـارات وابـراج ----------وشاخوا على ناسٍ وراهم مطافيـق
ويوم اعتلوا تخلخل الوضع ثم مـاج --------وهوت بهم من عاليات الشواهيـق
شف وينهم ماكـن منهـم حـدٍ داج ---------ومصيرهم مااظـن يحتـاج تعليـق
دنياك غبٍ تصطفق فيـه الأمـواج ---------ماتنومن لو جـا ثمرهـا مدانيـق
والعلم ماينفـع سفيـهٍ اليـا بـاج ---------لينـه يواجـه مايفـج المعالـيـق
والهم لاجاله على الـروح ميـلاج --------يلوفهـا لـوف الهـوى للزماليـق
والسيل مايخلف مسيلـه ولـو راج --------لازم يجيله مـع مسيلـه تصافيـق
اقولها يوم الحشـا هـاج واهتـاج -------وان هاج هاجت من مهيجه طواريق
ماادخل بدرب الا ولي منه مخـراج ------ولااستصعبت فتحت لي به مناتيـق
والله جعل للناس خليـان وافجـاج -------وانـا غرامـي خاليـات الفناتيـق
مع خوّت اللي لاقفـل كـل مـزلاج --------وقفاتهم يصحى بها العقـل ويفيـق
لاذعذع النسناس من عقب وهـاج -------وبرقه غداله في مزونـه تشاعيـق
وكثرت علوم السيل مـع كـل دواج -------وذكرت خباريها بهـاك المصافيـق
عقب الشهر ماينفع العيـن همـلاج ------لين انها ترقا المشاريـف وتويـق
على فياضٍ تنعش الـروح بإبهـاج ------يصحى بها الحاير ويسلا بها الضيق
ريحة زهر عشبه مع الروض لافاج ------يسوى عطر شقر البنات الغرانيـق
وقلط صفراً قبـل لاالنـور ينبـاج ----------على هشيـمٍ فيـه نـاره تساريـق
ينعشك ريحة غالي الهيـل لاهـاج --------وفنجالها يقعد خوى الراس لاذيـق
ومعنا اشقرٍ لاخيّش الخرب مـالاج ------يكسر عليه مع الهوى عقب تحليق
واليا انخرط كنه من الجـو ميـراج --------يودع ثنادي الخرب عقبه تفاريـق
هاذي هي السجه ولا غيرها احتـاج -------ومتى نبشـر بالمطـر والتوافيـق
وسلامتكم
---------------
آخر المشاركات
الإهداءات
07 Nov 2006, 02:43 AM
العرض العادي
