|
|
آخر المشاركات |
|
|||||||
| التسجيل | التعليمـــات | المجموعات الإجتماعية | التقويم | حرب المنتدى | البحث | مشاركات اليوم | اجعل كافة الأقسام مقروءة |
| بوح الخفايا وهمس القوافي قصـائـد وخـواطـر و نثـر و ادب " المنقوله والمختاره من قبل الاعضاء " |
 الإهداءات |
 |
|
#1 
05 May 2007, 07:37 PM
|
|||||||||||||||
|
|||||||||||||||
دروس في فن الشعر (1) =ادخل وشارك واسأل
السلام عليكم ورحمة الله وبركاته في هذا الموضوع ابا أعطي دروس عن وش اللي
يزين الشعر او يخليك تكتب ابيات اجمل وفيها ذوق وتعبير يخلي اللي يقرا ابياتك يتأثر بها وطريقة الموضوع اني لما اعطي درس عن التشبيه مثلا واجيب امثله ثم اللي يشارك يجيب ابيات فيها تشبيه وبها الطريقه الين نخلص كل الدروس واللي عنده سؤال عن نفس الدرس يتفضل وانا حاضر للتوضيح يعني أتمنى ان المشاركات تكون يا أبيات عن الموضوع او اسئله عن الدرس فقط وها الموضوع يفيد الشاعر او اللي يحب الشعر ويدور الجزاله والقوه في الوصف والمعاني اللي نلقاها في قصائد ابن لعبون وابن سبيل والهزاني ، وغيرهم وهذولي ماجا شعرهم قوي الا علشانهم يملكون مفاتيح الشعر الجيد واللفظ الجزل والمعنى القوي طيب وش مفاتيح هالشعر اللي نبي نحكي عنه ونجيب بعض الابيات منه ؟ ===== المفاتيح أو سر هالشعر الجيد في هاللي كتبته تحت 1---- شي من التصوير الفني والخيال 2---- شي من المعاني 3---- شي من الزخرفة اللفظية والتصوير الفني والخيال نبي ندرس فيه 1- عن التشبيه 2-عن الاستعارة 3- عن الكناية 4- عن المجاز 5- عن الرمز وابا ابدا في هالموضوع بالتشبيه وشو التشبيه ؟ ============================================= 1---- التشبيه وهو انك تشبه شي بشي او تشبه حاله بحالة الاول هو اللي تبي تشبهه بشي والثاني هو اللي تشبه به وفيه أداة التشبيه لكن موب لازم يكون التشبيه فيه اداة التشبيه وترى ادوات التشبيه واجد بس المشهور منهن الكاف ومثل ويشبه او تشبه وكنه أو كنها او كما مثل قول عبدالله العلي الرشيد الدار مثل البنت يكشف مغطاهليا صار ماتدرى عواقب رجاله وقول خضير الشمري الى قضى ماقلت مدوا بدرهامياراكبين جفـل كنهـن ريـم لاحظ انه شبه النياق الجفل بالريم واداة التشبيه كنهن خلصنا من التشبيه بأداة ++++++++++++++++++++++ نجي للتشبيه بدون أداة وهالتشبيه اقوى واجمل من اللي فيه اداة مثل البيت المشهورللدجيما ياجر قلبي جر لـدن الغصـونواغصون سدر جرها السيل جرا يعني ياجر قلبي جر مثل جر لدن الغصون وتلاحظ ان البيت يصير احسن واجمل بدون أداه قل أنتي قمر احسن من انتي مثل القمر وفلان صقر احسن من فلان مثل الصقر ================================== وتقدر تخلي التشبيه يكون بسيط اويكون مركب والبسيط هو اللي مافيه تفصيل مثل اذا قلت : عيونها كنها عيون ظبي ومثل : ياراكبين جفل كنهن ريم فالجفل مثل الريم وهذا واضح وسهل ولا فيه تفاصيل لكن التشبيه المركب اصعب واقوى علشان فيه تفصيل وأكثر من مشهد وفيه حركه ولا كل شاعر يقدر عليه ومن التشبيه المركب قول عبدالرحمن المقحم(طريبيق يابري حالي بري عود الثمـاموقع عليه الجراد وطار بغصونه فهو ماشبه حاله بعود الثمام بس كان يصير تشبيهه بسيط لكنه شبه حاله بحالة عود الثمام اللي ماكل الجراد اوراقه وغصونه بعد شف الفرق في التشبيه المركب عن البسيط ومن التشبيه المركب قول عبد الله بن هولان المطيري على لسان هلال المطيري يوم زعل هلال على الشيخ مبارك الصباح عام 1909 لاشك عند الشيخ ماني بمشكورافعل جميـل ولايلقيـه جابـه كني مفرغ قربته باوسط الخوريدفق صميله والبحر مادرى به فهو يشبه حالته وهويفعل الجميل ويمدح الشيخ ولكن الشيخ مااهتم به بحالة من يفرغ قربته بالبحر يظن انه يبي يزيد ما البحر والبحر مادرى عن قربة تصب فيه عرفتوا وش قصدي بالتشبيه المركب ؟ شفتوا وش طول المشبه وكثر تفاصيله وطول المشبه به وكثر تفاصيله بعد ================================ والتشبيه يمكن يكون واضح وصريح مثل اللي قبل ويمكن يكون مهوب واضح ولاصريح وهو اللي تلمح فيه التشبيه لمح بس انه غير واضح يعني اذا قريتا البيت عرفتا ان فيه تشبيه فلو تقول في المدح أنت مثل حاتم فهذا تشبيه واضح وصريح لكن لو تقول في المدح حاتم يتعلم منك الكرم فهذا تشبيه بس موب صريح وواضح و مثل هذا : قول محمد الخس المطيري يرد على الشاعر مفرح الضمني يوم عابه بسبب الشيب يقول محمد من شب شاب ولو سنينـه عطنـهوالشيب في وجه الرجل زود توقير وان كان به عذروب مافيـه منـهانته نزلت مع الرشا لاسفل البيـر شف انك تلمح التشبيه لمح وتفهم أنه يقصد أنه يشبه حالة التحول من الشباب إلى الكبروالعواده على شوي شوي بحالة اللي ينزل مع الحبل شوي شوي حتى ياصل لأسفل القليب وهي النهاية في العمر ================================================== ==== ولاحظ انك اذا بغيت تشبه شي بشي او حاله بحاله فلازم تفكر وش وجه الشبه بين هالشيين وعلشان كذا نحاول يكون وجه الشبه واضح و مشهور ولو ماذكرناه في تشبيهنا فلو تقول مثلا فلان مثل الكلب فالناس يبي يفهمون ان وجه الشبه هو الخسه والنجاسة وماراح يفكرون أنك تقصد انه وفي ولو تقول فلان كما الذيب فوجه الشبه هو الشجاعة والفطنة ولا احد راح يتصور انك تقصد أنه خطير أو غدار ارجع لبيت طريبيق وشف وجه الشبه فيه يابري حالي بري عود الثمـاموقع عليه الجراد وطار بغصونه فهو يشبه حاله يوم صار هزيل وضعيف بحالة غصن شجر الثمام اللي وقع عليه الجراد وكل منه اكثره فصار ضعيف مافيه حياة ووجه الشبه بين حالة الشاعر وحالة عود الثمام هو ( الضعف عقب القوة في كل منهم) شف ان حنا فهمنا وجه الشبه او قصد الشاعر من التشبيه بدون مايعلمنا الشاعر ولكن يمكن بعض المرات يكون وجه الشبه غير واضح فيحتاج انك تكتبه في تشبيهك وشعرك مثل قول بعضهم : أنت مثل موج البحر أن وقف مات شف وجه الشبه ( أن وقف مات ) فاللي نظنه أن تشبيه هالشخص بموج البحر في القوة لكن وجه الشبه هو: ( القوة اذا تحرك والموت اذا وقف ( ================================================== هذا الدرس الي عن التشبيه ورجاء الله لايهينكم نبي تكون المشاركات أبيات فيها تشبيه بسيط أو مركب صريح او مهوب صريح وبأداة تشبيه أو بدونها أو أسئلة ومداخلات عن هالموضوع فقط 
|
|
05 May 2007, 07:52 PM
|
رقم المشاركة : ( 2 ) | |
|
روح التميز والإبداع
|
تغذى عقلي من موضوعك يالسندباد .......... مثل ماتغذى النحل على رحيق الازهار مشكورررررررررررررررريالسندباد على موضوعك الرائع صراحه استفدت فائده كبيره استمر في دروسك اثابك الله على ماتقوم به واعانك وبارك فيك |
|
|
||
|
|
|
06 May 2007, 01:23 AM
|
رقم المشاركة : ( 3 ) | |
|
{ كاتـب مميـز }
|
اقتباس:
تشبيه مركب حلو يا اسيره  وانا اقول وش هالنحله اللي تدور حول رحيقي 
|
|
|
|
||
|
|
|
06 May 2007, 02:47 AM
|
رقم المشاركة : ( 4 ) |
|
كبار الشخصيات
|
مشكور يا السندباد على الموضوع الأكثر من رائع والله لايحرمنا من جديدك |
|
|
|
|
|
06 May 2007, 12:45 PM
|
رقم المشاركة : ( 5 ) |
|
{ كاتـب مميـز }
|
حياك يالادعشري وياليت تتحفنا بابيات من التشبيه ===================================== =============================== وهذي ابيات لابن لعبون في الغزل والتشبيهات الروعه حي المنازل تحية عين امصافح النوم سهرانه والا تحيه غريم الدين معسر ووافاه ديانه منزل فريد البها والزين عطبول مكحوله اعيانه ودي بنسيانها ومن اين ينسى محمد لخلانه اطيع انا في هواها اثنين سلطان قلبي وشيطانه اتبع هواها من اين الى اين واحظي بشوفه ورضوانه وابغضت الادنين والاقصين واحببت قومه على شانه يالايمي به شوين شوين عساه ياطاك بحصانه تمسي وتصبح بوفق شين ديان قلبي وديوانه ما شفت برق سرى ما بين ذيك الحواجب بليوانه |
|
|
|
|
|
|
06 May 2007, 03:43 PM
|
رقم المشاركة : ( 6 ) |
|
شـــاعـر
|
مشكووووووووووووووووووورر ابيات الوصف قول سلطان الهاجري في وصف الطايره لدبحة دوباح ذيب على الشاوي ضوى**مرخي زقمه لعرق الرطاه يشمها راسها اصغر من قفاها وباقيها سوى**عقرب ترفع ذنبها وترخي فمها |
|
|
|
|
|
06 May 2007, 08:33 PM
|
رقم المشاركة : ( 7 ) |
|
{ كاتـب مميـز }
|
مشكور على الابيات ياشاعر بني قحطان بس ماييزينا نبيك تغرف لنا من بحرك ابي احسن تشبيه مر عليك ++++++++++++++++++++++++ فيه تشبيهات تسمى العقم او النوادر وهي اللي يمتزج فيها التشبيه بالوصف الجيد مع المعنى الجديد اللي ماسبقه احد عليه وهذي بعض هالتشبيهات لابن لعبون من هالنوع
وبرق سرى به كن عالي رفيفه=يدين العذارى حين تصفق بالاكفاف
وفي وصف لمحبوبته يقول :
حدر الحواجب لميع سيوف=والسيف بظلاله الجنه
والجنه يعني خدودها وتشبيه اخر
رجالهم ما يسفه الا الى شاب=مثل القرع يفسد الى كثر لبه
(نبي لنا مزارع ننشده عن القرع) وقوله في دعاه على بلده الزبير :
يا مال هطّال صدوق حقوقه=يشبه كما ليل على الصبح ينساق ياضي كما حرب النصارى بروقه=يضرب لها المبذول منهم ويشتاق وفي وصف وحدة شافها في محل رافعتن غطاها شوي
محصنات ما علقهن الدبق=ما كشف غراتهن كود البريق شايلات مثل شيشات العرق=ناعمات والخمر خمر عتيق خيلهن تشربك يا حلو المرق=جيشهن ياكلك يالخبز الرقيق كنهن ياطن على اطباق الزلق=ان علاه الطل او نوض الطريق وتشبيه ثاني له
دار (مي) يوم (مي) لي تقوم=قومة المأموم من خلف الامــام يوم مي تحسب الدنيا تدوم=وان عجات الصبي دوم دوام في نعيم تحسبه لزم لزوم=مثل منزلنا على ديم الخزام يومها توريك خد به وشوم=يفضح البراق في جنح الظلام والهواوي من هواهن محروم=غير وصل لا حلال ولا حرام ومجموعه تشبيهات
قال الذي هيضه رعبوب=حط الجفا دوبه ودوبي مياس لاهل الهوى محبوب=هرجه عجاريف وعجوبي خده سواة الفنر مشبوب=شفته ضحى مر من صوبي والجيد جيد المها مسلوب=والعين ياعين الاشبوبي وهالبيت في الوصف الغزلي
داعجات غانجات لو تروم=كنهن في كنهن بيض النعام
وهذا تشبيه ووصف ورثى لمي
أبـو زرقا علـى خـده عـلامـه = تحلاهـا كمـا نـقـش بـغـازي عليـه قلـوب عشاقـه تـرامـى= تكسـر مثـل تكسـيـر الـقـزاز وتشبيه في محبوبه اخرى
والـجـبـيـن الـلــي بـروقــه تشـتـعــل=مــع جــعــود كـنــهــا داج الـلــيــال
==================+++++++++++++++++++++ ------------------------------------------------------------------ هذي بعض اختياراتي من تشبيهاته شف كل تشبيه ودور وش اللي اعجبك فيه تلقاه المعنى المبتكر او الجديد والوصف التفصيلي يعني كنه يرسم لوحه او كنه يسوي مشهد فلم -------------------==========+++++++++++++ للحكي بقيه 
|
|
|
|
|
|
|
07 May 2007, 11:39 AM
|
رقم المشاركة : ( 8 ) |
|
{ منتدى المنتديات الأدبيه }
|
شكرا جزيلا شاعرنا السندباد على الموضوع الرائع ونرجوا منك التكرم بمواصلة الدروس الله لا يهينك
|
|
|
|
|
|
|
08 May 2007, 03:55 AM
|
رقم المشاركة : ( 9 ) |
|
{ كاتـب مميـز }
|
الشي الثاني من التصوير الفني والخيال : الاستعارة طيب وشي الاستعاره الاستعاره قريبه من التشبيه بس فيه فرق مهم مره مره فالتشبيه لازم يكون فيه طرفين : مشبه ومشبه به مثلا لو تقول جت حبيبتي كنها قمر فهذا تشبيه لكن لو تقول : جا القمر فهذي استعاره معناها الاستعارة هي ببساطة تشبيه حذفنا منه أداة التشبيه والمشبه أو المشبه به مثل لو تبي تقول سلمت على الذيب – كلمة الذيب استعارة يعني استعرنا كلمة الذيب علشان نوصف بها هالرجال الشجاع لكن لاحظ انحن لو نقول : فلان كما لذيب فهذا تشبيه والاستعارة اقوى من التشبيه واجمل علشان فيها خيال اوسع وفيها بعد عن الحقيقه والشاعر كلما كان شعره وتعبيره ابعد عن الحقيقه كان اقوى واجمل ===================================== ولاحظ أنه لازم يصير فيه دليل على أن الشاعر مايقصد المعنى الحقيقي وهذا في كل استعارة ومن الابيات اللي فيها استعاره قول تركي بن عبدالله
طار الكرى عن موق عيني وفرا= وفزيت من نومي طرا لي طواري
الكرى مايطير في الحقيقه لكن اللي يطير هو الطير وهذا استعارة لأنه شبه الكرى بالطير وقول الشويعر ياصف عدو له
معلق مخلبه والطمع بك يريد=اضربه غارة لين تقلع مداه
طيب لو انشدك هو للعدو مخلب ؟ طبعا لا لأن المخلب للحيوان طيب وشو له جاب كلمه مخلب وهو يوصف إنسان ؟ الجواب: ان خيال الشاعر خلا له مخلب لأنه شبه العدو بحيوان مفترس وقول لافي بن معلث المطيري يمدح الملك عبد العزيز 1941م
ياشيخ ماتضفي جناحك علينا= تدمح لنا الزلات ياماكر الطيب
والممدوح الوكاد ان ما له جناح ولكن هذا على سبيل الاستعارة حيث انه شبه الممدوح وحطه كنه طير يرحم صغاره ويحماهم شف ولاحظ الخيال في الاستعارة وشف الفرق عن التشبيه ونلاحظ بعد أن المحذوف هو المشبه به وقول محمد ابو دباس
وغصون قلبي يافتى الجود يباس=غاد انا يابوك كني هشيرة
شبه قلبه بشجرة يبست غصونها وحذف المشبه به وهو الشجرة وعرفنا أنه شبه قلبه بشجره يوم قال وغصون قلبي والغصون ماتكون في القلب لكن في الشجره ========================================= 2=ويمكن نحذف المشبه ونذكر المشبه به في الاستعاره وهذا مثل قول الشاعر
نبي نبيد المال قبل يبيدنا= قبل يجي للمال هر يبيده
يعني قبل يجي للمال رجال طامع أو وارث نشوف ان الشاعريشبه الرجال الطماع اللي ينتظر الفرصة بالهر لأن الهرالحقيقي مايبيد المال فاللي يبيد المال هو الانسان ومثله قول حميدان الشويعر
لاجا ثور يخطب بنتك= فاضرب رجله وقل له قف
يقصد رجال يخطبها وشبهه بالثور لأنه متهور أو ماعنده عقل وتروي ومن الاستعارة قول محمد بن مسلم يتغزل
مريت ظبي يشتري له حواجه= عليه ناس واقفين يضولون
والشاعر مثل مانشوف استعار كلمة ظبي لهالبنت المزيونه اللي شافها وهذا معلوم من باقي البيت فاللي يشتري هو الإنسان معناها ان كلمة ظبي مستعملة في غير معناها الحقيقي وفيه دليل على أن الشاعر ما يقصد المعنى الحقيقي وهذي هي الاستعارة ======================================= ولو تتبعنا الشعر لقينا أن واجد من الشعراء امتلا شعرهم بالاستعارات الخياليه الجميله كم مره سمعنا ولا قرينا قولهم ياغزال رماني أويالقمر أوياغصن موز أوياعود ريحان وكل هذا استعارة علشانهم ماقصدوا المعنى الحقيقي ==================================== ولكن لابد للشاعر من دليل على أنه مايقصد الغزال أوالقمر أوالغصن الحقيقي مثلا طيب وش الدليل ؟ اذا وصف الغزال أو القمر أو الغصن بصفة من صفات الإنسان مثل لو يقول الغزال يضحك أو يكلمني أو نام القمر عندي وبهالشي نفهم أنه يقصد شي آخر وأنه يستخدم خياله فالدليل يا انه يكون موجود في الابيات او يكون مفهوم بدون مايذكره الشاعر يعني لو رجعنا لبيت ابن مسلم
مريت ظبي يشتري له حواجه= عليه ناس واقفين يضولون
حنا عرفنا انه مايقصد الظبي الحقيقي ليش ؟ لانه مافيه احد يتوقع ان ظبي رايح يتسوق من المحلات وفي بيت الشويعر
لاجا ثور يخطب بنتك= فاضرب رجله وقل له قف
وشلون عرفنا ان ثور ماتعني الحيوان المعروف؟ طبعا يوم قال الشاعر يخطب بنتك والثيران ما تطق البيوت وتخطب ! = ويقول نمر بن عدوان ياغصن موز تحته المي جارا= في وسط بستان دنت منه الاثمار  وهو يقصد بغصن الموز زوجته لأن القصيده غزلية عاطفية+++++++++++++++++++++++++++++++++++++ ++++++++++++++++++++++++++++++++++ ++++++++++++++++++++++++++++++ +++++++++++++++++++++++ من عنده ابيات فيها استعاره يجيبها وللحديث بقيه دمتم
|
|
|
|
|
|
|
09 May 2007, 05:58 AM
|
رقم المشاركة : ( 10 ) | |
|
روح التميز والإبداع
|
ياسلاسل الذهب ... زيني اعناق حياتي ولاتتشره علي ياالسندباد ترى جديده في الدروس واستر ماواجهت والف الف شكرررررررررررررررررر على الدروس القيمه لاعدمناك |
|
|
||
|
|
|
| أدوات الموضوع | إبحث في الموضوع |
| انواع عرض الموضوع | |
|
|
العرض العادي
